Хтулри чIехи буба шадарзава

Категория: На русском » Все новости » Дзюдо
admin5-06-2019, 14:51920
Хтулри чIехи буба шадарзава
Мукьвара чпин ери-бине Докъузпара райондин Каракуьре хуьряй тир Алан ва Рамазан Абдулкеримоври (стхаяр тир Исмаиланни Фаридан рухвайри) спортдин рекье къазанмишай агалкьунри неинки чпин сихил, гьакI хуьруьнвиярни шадарна. Хтулрин агалкьунри дамахдин гьиссер гзафни-гзаф абурун чIехи буба Завир Шагьисмаиловичак кутуна.

Къейд ийин, Алан ва Рамазан Докъузпара районда вирибуруз сейли агъсакъал, «Хайи чилиз авай кIанивиляй» республикадин шабагьдин сагьиб Завир Абдулкеримован хтулар я. Абурун сихилда спортдин рекье агалкьунар къазанмишавайбур мадни ава. Жаван спортсменри чпин ими, 90-йисара дзюдодай Европадин чемпионвилин тIвар къазанмишай Замиралай чешне къачузва, адан хва Гьамзатни спортдин и жуьредай чIехи агалкьунар къазанмишнавай пагьливан я.

Алан 2004-йисуз Дербент шегьерда дидедиз хьана. Алай вахтунда ада шегьердин 15-нумрадин мектебда 9-классда кIелзава, гьеле вад лагьай классда авайла, ам 5-нумрадин ДЮСШ-да тренер-насигьатчи Фейзулла Халилован регьбервилик дзюдодал машгъул жез гатIунна. Спортдал машгъул хьайи сифте йисарилай эгечIна ада акъажунра хъсан чкаяр кьазва. Мукьвара ада 5-нумрадин ДЮСШ-дин кIвенкIвечивал патал жегьил дзюдоистрин арада кьиле фейи акъажунра (42 килограммдин дережадай) 1-чка кьуна.

Аланахъ галаз санал адан имидин хва Рамазанни винидихъ тIвар кьунвай спортдин мектебда 2014-йисалай дзюдодал машгъул я. Ада алай вахтунда Дербентдин 18-нумрадин мектебда 9-классда кIелзава. Са тренердин гъилик вердишвилер къачузвай пагьливанри чеб гележег авай спортсменар тирди къалурзава. Къуй абурукай дуьньядин дережада гъалибвилер къачудай кьегьалар хьурай!

Хтулри чIехи буба шадарзава







Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.